(I)
Oesianja soedah deket toedjoe poeloehan ketika satoe prempoean toea dengen tindakan perlahan dan tida tetep keliatan masoek kaloear beberapa roemah te-rtentoe jang ditinggalin oleh orang2 jang masi tersangkoet pamilie dengen ia, potongan badannja rada gemoek sedikit boengkok dan ramboet kepalanja soedah poetih semoea, pakaiannjapoen soedah setengah koemal dan sepasang selop lagi, saking bedjat dan toeanja. Kendati begitoe, toch dari tampang moekanja masi kentara ia itoe tadinja mesti masoek golongan toeroenan “ba-potjo” seperti jang dipermoelaan abab ini orang tionghoa seboet bila ia itoe hartawan atawa tjoetjoe seorang opsir tionghoa baik dengen pangkat letnan, kapten atawa madjor.
Dan sasoenggoehnja djoega itoe nenek ada anaknya letnan Tionghoa pertama dikota asalnja, sedeng kakaknja oleh goebermen Hindia Belanda diangkat sebagi kapten dilaen kota jang tida djaoeh letaknja.
Sebage gadis seorang hartawan dan berpangkat tentoe sadja hidoepnja tida koerang apa-apa, tetapi nasib manoesia berada didalem tangan Toehan. Ia menikah dengen seorang Tionghoa jang tadinja keliatan baek-baek sadja kendati si baba mantoe boekan golongan hartawan atawa berpangkat.
Oleh kakak iparnja ia dimadjoeken sebage pemegang pach tjandoe. Dizaman itoe oleh goebermen Hindia Belanda, pendjoealan “diborongkan” kepada siapa jang berani kasi harga tertinggi boeat mendjadi pemegang pachnja. Pamarentah tjoema tahoe sakean boeat pendjoealan garem, tjandoe atawa pendapatan pegadaian di soeatoe tempat. Roegi atawa oentoeng ada terserah pada nasibnja si toekang pegang pach.
Dan ditempat tinggal jang baroe sebage pach tjandoe, ketempat mana si baba mantoe bojoeng istrinja, ternjata ia melangsoengi sebage toekang pach jang kedjem zonder mengenal ampoen terhadep para korbannja jang olehnja bermoela dirajoe dan diboedjoek oentoek isep tjandoe. Sebab makin banjak orang jang ketagihan ratjoen itoe, makin padet ia-poenja kantong.
Para langganannja, kalaoe tida poenja doeit, bole toeker dengan tjandoe segala miliknja, roemah, pekarangan, lemboe dan sampi, sampepoen gadisnja sendiri tida ditolak, asal sadja itoe anak dara disetoedjoei oleh si baba mantoe jang belakangan poen ternjata ada satoe pemaksaan jang tida kenal bates.
Si baba mantoe sendiri jang tadinja boedjoek dan andjoerin orang2 boeat djadi pemadatan, belakangan dirinja sendiri kena pintjoek dan mendjadi “Pendjeret” jang nomer wahid. Habis, kapan tjandoenja tjoema tinggal ambil sadja boekan ?.
Dari pernikahan ia dapet satoe anak prempoean jang olehnja begitoe dimandjakan hingga sigadis tjoema beladjar inget kapentingan diri sendiri sadja.
Katika ia soedah berangkat besar ia dilamar oleh seorang saoedagar hasil boemi oentoek poeteranja. Karena berdoea pihak orang toea soedah pada satoedjoe perkawinan didjadiken, zonder tanja doeloe bagemana pikirannja si djedjaka dan si gadis, seperti jang memang soedah mendjadi adat dizaman itoe.
Ini perkawinan lahirken saorang anak lelaki jang oleh kakek dan bapanja poen sanget dimandja . Ini anak dianggap tida bisa salah, bila ia sampe menangis jang salah jalah boedjang2 jang mendjaganja, atawa poen nenek atawa iboenja sekalipoen. Bisa dimengerti jang tjara didik sematjam ini bisa seret anak itoe esoknja ketiang penggantoengan.
Karena toentoet tjara hidoep jang begitoe, tjoema bisa merangkoel pedoetan dan prempoean sadja jang didjadiken korbannja, achirnja ia diserang oleh penjakit heibat jang dalem tempo pendek sekali soedah bikin tamat hidoepnja.
Tinggalah sang istri jang meneroesken dengan dibantoe anak mantoenja sendiri. Tetapi ternjata si baba mantoe tida betjoes oeroes pakerdjaan pach tjandoe tetapi boeat iboe mertoeanja seperti piara maling dalem roemahnja. Karena segala apa jang ada harganja pasti ditjoeri oentoek didjoeal pada orang loear dan oewang pendapetan pentjoerian itoe digoenakan oentoek berpesta poera sama gondal2nja jang tida loepa kadang2 djoega sediaken prempoean belian.
Sekarang si baba mantoe ikoet-ikoet djadi pemadatan djoega. Belon tjoekoep satoe taon ia soesoel bapa mertoeanja kedalem lobang koeboer.
Sekarang tinggal doea djanda iboe dan anak serta tjoetjoe lelaki. Sebab terang tida bisa dilandjoetken pekerdjaan sebage pach tjandoe, maka oleh kakaknja si njonja toea disoeroeh pindah lagi ke-kota asalnja. Sebab maloe kalaoe inget tingkah lakoe almarhoen soeaminja, maka itoe njonja toea lebi soeka beroemah tangga sendiri dengen anak dan tjoetjoenja.
Bermoela hidoep marika tida terlaloe soekar, si njonja toea masi poenja sedikit harta peninggalan, sisah dari waktoe soeaminja masi oeroes pach tjandoe, tetapi.................... dasar sang nasib soedah tetepken laen !
Anak prempoean ternjata malasnya boekan maen. Ia tjoema taoe semoea minta ada, semoea minta beres, katambahan si tjoetjoe, hasil didikan jang kliroe, ada anak jang paling soesah diatoernja.
Sekarang oesianja soedah hampir 15 taon sekolahnja tjoema kelas 4 sekolah dasar. Kepandaiannja tjoema minta doeit sadja dan kamoedian bergoelang-goeloeng dengan segala anak glandangan, terhadep siapa ia senang sekali bila dioenggoel-oenggoelken sebage anak hartawan jang masi tergolong “sia” artinja toeroenan dari orang Tionghoa jang pernah mendjadi opsir.
Sisah simpenannja habis diperas oleh anak tjotjoenja sendiri sekarang apa jang mesti dibikin ? Tida ada lain djalan selain mengadai pada bekas pamili. Dan jang dipaksa djalan keliling masoek kaloear roemah pamili boekan lain ................ adalah si njonja toea sendiri.
Dengan pertimbangan (menoeroet pikirannja sianak pemalas dengan disokong oleh tjoetjoenja jang moertad) kalaoe si iboe dan nenek jang djalan orang lebi kasian dan sokongan tentoe ada lebi banjak boeat beli beras, goela, kopi dan segala kaperloean dapoer. Bagaimana perasaan si njonja toea selagi kepaksa masoek kaloear roemah pamili ? Tjoeman Toehan jang tahoe.
Kadatangannja “nja potjo” seperti jang masih diseboet oemoenja masi diterima dengen hormat dan dengan tjara jang sama sekali tidak menjakitkan hatinja itoe orang toea. Ia dipersilahken doedoek dimedja makan, disediaken makanan dan minoeman serta tida loepa tempat kinangan (Nyirih) berikoet tempat loedah,..... semoea menoeroet adat di zaman itoe. Dan kalo berpamitan poelang, disoroeh sediakan dokar jang ongkosnja soedah lebi dahoeloe dibajar oleh njonja roemah hingga ia tida oesah djalan kalaoe lagi bawa poelang boengkoesan beras dan sebagenja. Serta oewang jang dengan hati2 diselempitkan disaboek-nja tida koerang dari oewang kertas dari sepoeloeh goelden. Sekoerang-koerangnja oewang perak dari satoe goelden.
Sampe di roemahnja si nenek djangan dikira bisa mengasoeh ia poenja anak jang dari pagi tjoema bisa tidoer2an dibale2 sadja, samboet kedatengannja dengen tjoemelan kenapa perginja sampe begitoe lama, toch soedah tahoe di roemah soedah tida ada beras, tida ada ikan, minjak boeat goreng dan minjak tanah boeat lampoe temploknja poen soedah tida ada.
Karena dari pengalaman soedah taoe djika dibantah tjoeman timboelken onar besar hingga oendang tetangga2 boeat toeroet saksiken hal2 jang sanget memaloeken, maka sang nenek tida djawab apa2 hanja teroes bawa beras kesomoer boeat di tjoetji dan kamoedian di masak.
Ia achirnja masi repot goreng ini dan itoe, ketika anaknya tinggalkan bale2nja dan teroes enak sadja ambil tempat doedoek dipinggir medja boetoet jang digoenakan sebage medja makan. Tidak loepa si anak doerhaka minta doeit jang didapat dari koenjoengan roemah pamilie , sebab “takoet hilang”, toch mama soedah toea, tida perloe pegang doeit”.
Dengan tinggalken anaknja jang soedah moelai dahar dengen ditemenin oleh tjoetjoenja, si njonja toea masoek di kamar bagian belakang. Pikiran apa jang waktoe itoe dikandoeng olehnja, tjoeman Toehan sadja jang tahoe. Kita hanja bisa tebak2 selagi perhatiken bagaimana si njonja toea, dengen doedoek dipinggir balenja, awasin satoe podjok dalem kamarnja jang sempit serta aer matanya dengen perlahan-lahan menbasahin kedoea pipinja jang soedah keripoet.......................

Begitoelah hari ketemoe hari hidoepnja itoe njonja toea seperti disiksa sadja, baik oleh anaknja sendiri, apalagi oleh tjoetjoenja jang boekan tjoema berani bentak dan maki neneknja malah kalaoe ia lagi haoes doeit, tida segan boeat preksa dengen paksa boentelan si njonja toea, kalaoe2 ada doeit jang di semboenjikan didalemnja. Siksaan lahir bathin itoe njonja toea tida kepalang beratnja.
Kepada toehan ia pandjatkan doa memohon ampoen boeat segala dosa jang sekiranja ia pernah lakoeken dimasa2 jang kepoengkoer. Dan achirnja Toehan dalem moerahNja, kaboelken permohonan dari mahloek-nja, jang hidoep begitoe sengsara.
Pada soeatoe pagi. Ketika anaknja dengen moerkanja gedor2 pintoe kamar-nja karna si njonja toea ternjata belon bangoen, waktoe daon pintoe itoe achirnja diboeka dengen paksa, si njonja toea kedapetan tidoer tjelentang diatas bale2nja dengan kedoea tangan disoesoen keatas dadanja. Tampang moekanja keliatan sanget tentram dan eilok sekali dengan senjoem jang menghiasin bibirnja jang tertoetoep rapat. Itoe njonja toea ternjata soedah meninggal doenia.
Boleh dibilang semoea pamili dan kenalan pada dateng boeat sembajang dan toeroet hanter ke koeboeran jang soedah disediaken oleh pamilie jang terdekat. Koeboerannja pake bongpay (batoe nisan) dimana ada toeroet dateng hwee-sio2 dari kelenteng jang berdekatan.
Sesoedah iboenja meninggal, si anak jang haroes gantiken dan sekarang giliran ia boeat di bentak-bentak, dimaki, dipaksa keliling keroemah2 pamili boeat minta pertolongan doeit, beras, dan sebagainja.
Tetapi beda dengen iboenja doeloe jang selaloe kedatengannja disamboet dengan ramah oleh toean roemah, orang bilang si anak memang “boo hok gie” tidak ada peroentoengan, mala tabeatnja ada menolak redjeki.
Ketambahan poeteranja jang sekarang soedah mendjadi djedjaka tanggoeng dengan oesia dalem 20 taon. Malasnja boekan maen. Ia biasa bergelandangan poelang hampir pagi dan sesampenja di roemah teroes tidoer, baroe bangoen kalo soedah liwat tengah hari. Dan begitoe bangoen, iboenja soedah moesti sediaken ia makanan disertai kopi toebroek jang tida boleh katinggalan. Kalo tida si iboe bisa dipastiken akan dimaki-maki habis-habisan oleh itoe anak moertad. Atawa dipaksa keloear roemah lagi tadinja ia tjoema berhasil sedikit koempoelin oewang dari penderma-penderma diantara pamilie sendiri.
Soedah begitoe roepanja si anak doerhaka belakangan poen soeka berdjoedi. Sebab kadang2 ia keliatan kantongin banjak doeit, satoe hal jang tida moengkin boeat orang pemalas seperti ia, katjoeali doeit itoe didapat dari perdjoedian. Tetapi kendati si iboe pernah pergokin anaknja dalam kamarnja dengen semboenji hitoeng doeitnja, belon pernah ia dikasih oewang boeat kaperloeannja sendiri. Paling banjak kepada ia dilemparkan satoe atawa doea goelden boeat sagala kaperloean boeat makan. Dan awas kalaoe ternjata ada jang tida betoel rekenan kombali doeit tadi habis diboeat beli beras, ikan dan sebagainja. Kalaoe tjoema dibentak dan dimaki sadja soedah bagoes, inilah nasib si iboe hidoep dengen anak lelakinja jang dahoeloenja begitoe ia banggakan dan mandjakan.
Siksa lahir dan bathin si iboe roepanja masih belon sampe takerannja. Karena pada soeatoe hari sedeng si iboe sehabis sediaken nasi dan ikan gorengan, lagi berada diloear roemah boeat lepasken lelah mendadak liat anaknja dateng dengan naek delman serta ditemenin oleh seorang prempoean moeda. Dari tjara berdandan-nja kentara sekali jang dibawa oleh anaknja jalah ...... soendal kampoengan biasa.
Begitoe sampe oleh si anak iteo prempoean, Tiar namanja dihadepken iboenja seraja bilang, boeat selanjoetnja Tiar akan tinggal sama2 marika. Tiar itoe soedah ia ambil sebagai selirnja, begitoe anaknja terangken. Lebih perih lagi si iboe diprentah oentoek beresken kamar jang didepan, jang paling besar oentoek sianak dan Tiar tinggal. Koper dan boengkoesan Tiar adalah koeadjiban si iboe djoega boeat bawa masoek. Sedeng Tiar sendiri dengen bangga dan kapala terangkat masoek ka-dalam dengen liwatin iboe babanja seolah-olah liwatin angin sadja.
Dengan hati dirasakan seperti hantjoer itoe njonja toea kepaksa lakoeken apa jang diperentah oleh anaknja jang sementara itoe kedengeran lagi ia terangkan ini dan itoe pada djantoeng hatinja. Baroe doea hari tinggal bersama didalem tempo dimana si iboe soedah mesti lebi giat lagi datengin roemah2 pamilie karena dengan adanja Tiar, tentoe sadja ongkos roemah tangga djoega toeroet bertambah; baroe doea hari Tiar tjampoer dengen babanja, dan soedah seringkali bentrokan dengen si iboe.
Pekerdjaan-nja si toea bangka tida bisa andalkan. Masak nasi sadja tida betjoes dan masakannja tida ada satoe jang tida di tjela, koerang ini dan koerang itoe. Tetapi Tiar sendiri tiap hari temanin babanja didalem kamarnja. Tjoema keloear kalaoe hendak mandi dan sasoedah berhias dan toekar pakean, ia dengen babanja djalan2 setahoe kemana, kapan masi manten baroe, apa salahnja? Kalau sibaba lagi menang djoedi loemajan djoega bisa pelesir naek delman dan mampir di waroeng ini dan itoe.
Kalaoe tida, apa boleh boeat, tinggal di roemah sadja. Iboe makin berat koeadjiban nja. Kalaoe doeloe ia mesti tjoetji pakean anaknja dan pakeannja sendiri, sekarang si Tiar poenja pakean bekas dipake djoega mendjadi tanggoengannja. Dan awas kalaoe seterikanja koerang rapih atawa tjoetjinja koerang bersih, si toea bangka pasti dimaki habis-habisan sebage orang jang tjoema taoe ikoet “njaplok badokan” sadja.
Kalaoe Tiar lagi toemplek amarahnja diatas kepala iboenja, si baba toeroet dengerin mala sering ikoet “srobi” iboenja sendiri boeat bikin seneng hati selirnja. Satoe kali pernah si anak poelang dengen bawa banjak sekali oewang, habis menang djoedi. Setahoe lantanran apa ketika ia papasan dengen iboenjajang baroe datang dari dapoer, si anak angsoerken selembar oewang kertas dari 10 goelden. Meliat ini Tiar seperti seekor matjan betina jang hendak terkam mangsanja, samperin itoe njonja toea dan oewang pemberian dari anaknja dirampas. Boeat apa ia kasih oewang lagi, treak Tiar. Siapa tahoe kalaoe lagi keliling ke roemah pamilie, belon tentoe sitoea bangka tida djoega oempetin sebagian doeit jang ia dapet koempoelin.
Si iboe tida bisa bilang apa2 lagi, hanja ia pergi kebelakang dimana deket dapoer memang ia ada sediaken satoe kamar sempit. Dan disana sembari doedoek di bale2nja. Ia menangis sesoegoekan.
Namanja djoega djoedi ada jang menang pasti ada jang kalah pada soeatoe sore sibaba langsoeng kombali dari tempat perdjoedian. Pikirannja kaloet karena ternjata ia roedin sama sekali. Ia boeroe2 poelang boeat ambil sisa oewangnja oentoek dipertaroengkan lagi. Siapa tahoe moengkin kali ini akan moedjoer.
Ketika ia masoek dikamarnja ternjata Tiar masih tidoer. Ia kasih bangoen selirnja boeat minta anak koentji boeat boeka lemari oentoek ambil doeit simpenan-nja. Ketika ia lagi hitoeng lagi, mendadak ia bertreak-treak tanja siapa jang berani tjoeri oewangnja jang ternjata koerang seratoes.
Tiar kaget djoega karena sesoengoehnja ia orangnja jang tadi betot selembar dari seratoes goelden. Ia tida kira babanja soedah hitoeng semoea. Si iboe lantas sadja djoega dipanggil dan zonder tanja apa2 lebih dahoeloe itoe prempoean toea ditoedoeh mendjadi bangsatnja.
Dengan soeara terpoetoes-poetoes karena tida tahan lagi tangisnja, si iboe terangin mana bisa djadi ia jang tjoeri? Karena ia tida boleh masoek sembarangan kekamar anaknja dan kalaoe satoe2 waktoe masoek djoega jalah oentoek sapoe djoebinnja saja selamanja tida pernah sendirian.
Mendengar keterangan si iboe, Tiar medjadi sangat koeatir kalaoe perboeatan-nja tjoeri oewang ketahoean. Boeat lindoengin dirinja ia goenaken taktiek jang ia harap aken ditelan oleh babanja dan dengen begitoe ia bisa selametkan dirinja. Dengan bertreak-treak Tiar samperin si njonja toea jang ia toeding2 dengen djarinja. Kalaoe si toea bangka berani toedoeh ia, nanti moeloetnja aken dirobek-robek.
Dan sekarang baek pilih sadja, katanja dengen lantang sembari toendjoeken lirikan mata djalangnja ke djoeroesan babanja jang ia soedah lama tahoe bagaimana mesti dipake boeat bikin ia toeroet kamaoeannja si selir. Sekarang bole pilih, ia atawa si toea bangka jang mesti keloear dari ini roemah, treak Tiar sembari toemboek2 medja-makan didepannja.

(III)
Meliat selir jang ia begitoe tjintakan mendjadi begitoe goesar, mala menantang hendak keloear dari roemah tjilaka, boeat si anak doerhaka tida ada lain djalan selagi dari pada soeroh iboenja pergi saja. Di oesir dengen tjara begitoe, si iboe dengen menagis tersendoe-sendoe balik kemar dan tida lama lagi keloear poela dengen bawa satoe boengkoesan ketjil, isi pakean-nja sehari-hari.
Ketika soedah berada didepan anaknja, si iboe berenti sedjenak. Dengen mata jang tida berkedip ia awasin dan awasin lagi tampang moeka dari anak kandoengnja jang ia doeloenja begitoe tjintakan dan madjakan seolah-olah hendak simpan tjitakan roman itoe boeat selama-lamanja.
Ia hendak oetjapkan apa tetapi tangisnja jang sesegoekan bikin ia tida bisa oetjapkan barang satoe patah. Itoe waktoe soedah poekoel anam sendja; si njonja toea tida maoe minta mondok pada pamilie; ia maloe boeat mengakoe soedah di oesir karena katanja soedah tjoeri oewang. Selagi ia djalan sepanjang djalan , dalem pikirannja timboel ini kainginan jang makin lama makin berwoejoet teges sekali. Ia hendak kekoeboeran iboenja. Disana ia akan mengasoh dan memoehon ampoen boeat dengen segala dosanja. Ketika achirnja ia sampe ketanah koeboeran jang loeas. Itoe keadaan soedah moelai gelap. Kendati waktoe itoe bener remboelan soedah moentjoel, tetapi sinarnja dialing-alingin oleh mega2 jang tebel.
Itoe njonja toea keliatan sangsi, koeatir tida bisa temoeken koeboeran iboenja dalem keadaan begitoe. Mendadak mega2 tadi terpoekoel boejar oleh angin jang menioep kentjang sekali. Seloeroeh tanah koeboeran mendadak seperti digoejoer oleh sinar perak jang bikin leloeasa si njonja toea bisa landjoeken perdjalanan kekoeboeran iboenja.
Sesampenja disana ia taro boegkoesannja dipodjok medja sembajang jang lengket dengen bongpay.....
Kamoedian dengen soesah pajah tekoek kedoea loeteotnja jang dirasakan kakoe sekali karena djalan amat djaoeh; sedeng toeboehnja di bongkok-in begitoe dalam hingga djidatnja kena kepada medja sembajang dari batoe itoe. Dengen kedoea tangannja jang ditantjapkan diatas medja boeat toendjang badannja, ia dengen menangis sedih sekali mohon ampoen pada arwah iboenja boeat segala kesalahan dan dosa jang pernah ia lakoeken.
Seperti liat di tjermin jang besar si anak bisa saksikan kombali satoe demi satoe segala perboeatan terhadap iboenja jang tadinja ia siksa diloear pri-kemanoesia-an. Lama sekali si anak menangis dan meratap didepan koeboeran itoe. Dengen tjoema koeboeran sadja jang mendjadi saksinja, ketjoeali sinarnja remboelan poernama jang tida berenti terangin itoe toeboeh prempoean toea dengen soeara tangisnja.
Sekarang kadengeran seperti dateng dari tempat djaoeh sekali; kadang2 toeboehnja bergerak sebentar dan kamoedian teroes diam tjoema ramboet kepalanja jang soedah tipis dan beroeban semoea jang bergerak karena kadang2 ditioep oleh angin hingga satoe waktoe bikin konde-nja terlepas dan ramboetnja liwatin kepala tersebar diatas medja sembajang, seolah-olah sadjian boeat sembajangin arwah iboe-nja.
Malam diganti oleh sang pagi. Si njonja toea masih tetep dalem keadaan sabermoela. Hal ini tarik perhatian-nja satoe toekang roempoet jang memang biasa dateng ditanah koeboeran iteo.
Bermoela ia tegor iteo prempoean jang kedapetan masih meringkoek sadja sebage orang jang lagi sembajang. Ketika tegoran-nja tida digoebris, si toekang roempoet dateng lebih deket, maksoetnja boeat ingetken si njonja baik poelang sadja.
Ketika ia pegang poendaknja jang dirasaken kakoe dan dingin sekali, mendadak itoe toekang roempoet lempar pikoelan-nja dan lari balik kekampong-nja.
Dalem sekedjap saja keadaan mendjadi riboet. Kepala kampoeng, polisi, dinas roemah sakit semoea pada dateng, djoega pamilie terdeket si njonja, jang ternjata soedah meninggal doenia.
Dokter njatakan si njonja mati karena serangan sakit djantoeng. Oleh pamilienja si njonja poenja koeboeran digalih persis disebelah koeboeran iboenja. Poen bongpay-nja dibikin seroepa sedang goedoekan tanah dibelakang boekan beroepa doea goedoekan hanja satoe sadja. Kalaoe ada jang hendak melawat kesana tida bisa ketemoeken koeboeran iboe dan anak hanja tiap orang dikampoeng koeboeran mana jang diberi nama KOEBOERAN KEMBAR.
Di SORE iboenja dioesir dari roemah nja, baba si Tiar njataken hendak oedji kembali peroentoengan-nja. Karena kali ini mesti aken menang banjak. Semoea doeit di bawa sedeng Tiar tjoema diberiken beberapa pitjis sadja tjoekoep boeat beli tangselan peroet. Sementara Tiar, begitoe lekas si toea bangka dioesir pergi, niatnja boeat tinggalken si baba keparat lebi mantep lagi. Apa jang bakal ditoenggoein ? Dengen tida adanja si toea bangka, djangan2 ia jang nanti moesti tjoetji segalanja. Ketika babanja pergi, Tiar beresin pakeannja jang ditaroh di tas ketjil jang memang mendjadi miliknja. Tas ini di semboenjiken di satoe tempat jang Tiar gampang bisa ambil.
Pada djam doea tengah malem pintoe depan diketok dan belon diboeka, Tiar soedah denger bagaimana si baba dengen soeara girang njataken bener pirasatnja. Sesampenja didalem si baba dengen soeara berisik bilang, kali ini ia menang tida koerang dari tiga riboe goelden, seraja kasi liat pada djantoeng hatinja setoempoek oewang kertas. Tiar girang sekali; ia beriken tjioeman mesra serta beresken tempat tidoer babanja jang tentoe saja mesti tjape sekali.
Si anak moertad masih sempet treakin iboenja jang ia tadi hendak soeroe sediaken kopi toebroeknja. Tetapi ia mendadak inget si toea bangka lagi ngamboel; tida beberapa hari lagi pasti aken moentjoel kombali. Dengen perasaan lega girang dan poeas sibaba tida lagi keliatan soedah tidoer njenjak sekali, didampingi oleh Tiar jang toch aken djaga babanja se hidoep semati, boekan?
Ketika djam dinding tetangga kasi denger poekoel 5 pagi, Tiar anggap ini soedah waktoenja oentoek bertindak. Dengen hati2 tetapi tjepat ia tarik anak koentji lemari dari bawah bantalnja sibaba jang keliatan masih enak tidoer sadja. Toempoekan oewang diraoep sama sekali dan dikasih masoek dalem tas-nja. Kamoedian dengen hati2 ia kombaliken anak koentji ditempatnja, boeka dengen perlahan pintoe kamar dan pintoe depan jang kamoedian ia toetoep kombali.
Sekarang Tiar soedah merdeka; poenja doeit jang loemajang djoega. Dengen tindakan tjepet ia berdjalan kedjoeroesan oetara.
Diwaktoe hampir tengah hari achirnja sibaba bangoen dari tidoernja; ia tida ketemoekan Tiar disisinja. Moengkin ia lagi pergi di belakang pikir si baba jang djoega lantas kesana. Tatapi disana tida bisa ketemoeken Tiar. Hati tjoeriga moelai moentjoel; boeroe2 ia masoek kekamarnja. Soekoerlah anak koentji masih ada ditempatnja. Tetapi baek djoega boeat dipreksa.
Lemari diboeka........... satoe djeritan pandjang dan kedengeran ngerih bikin kaget sibaba poenja tetangga2. Oewang habis, barangnja poen ada jang dibawa oleh si soendal jang tjilaka; ia maoe bakar roemah, maoe mengamoek, sampe achirnja diantjam oleh orang2 sekampong, djika ia tida lantas tenang, mereka beramai-ramai akan hadjar ia ! baroe si baba keliatan takoet.
Tida lama kamoedian sedari terdjadinja oewang terbang, goendik hilang, ia mesti kaloear dari itoe roemah jang di sewa-nja soedah ditoenggak beberapa boelan. Si baba hidoepnja bener2 terloenta-loenta; ketambahan sedari ia oesir iboe-nja dan kena goentjangan heibat dengen minggatnja si Tiar jang bawa kaboer semoea doeitnja, kedoea matanja soedah tida bisa digoenaken seperti biasa. Ia selaloe liat semoea dengen remang-remang, seolah-olah pemandengan-nja dirintangi oleh kaboet tipis. Apalagi diwaktoe malem soedah seperti orang boeta sadja.
Oleh pamilie jang masih merasa kasian terhadapnja, ia dibawa ke dokter mata. Dokter tida bisa tolong lagi. Si baba poenja kedoea bidji mata ada baek, tjoema oerat2nja jang lembek. Maka itoe pengliatannja selaloe remang2 dan kaloe gelap seperti boeta. Katja mata tida aken bisa menolong apa2 seperti djoega satoe operasi, karena jang lembek ada semoea oerat2nja.
Begitoelah si baba achirnja dengen tongkat keliling mengemis sana sini; sore balik ke kelenteng di mana ia bisa melingkar di djoebin atawa di bawah pohon deket tembok depan.
TANAM ROEMPOET MOESTAHIL TOEMBOEH PADI.